काठमाडौं । नेपालले आईसीसी क्रिकेट विश्वकप लिग–२ मा शीर्ष स्थानको स्कटल्यान्डविरुद्ध ६ विकेटको सानदार जित निकालेको छ। यो जितसँगै नेपाल अंकतालिकाको पाँचौँ स्थानमा उक्लिएको छ।
नेपालले समान २२ अंक भएको नामिबियालाई नेट रनरेटमा पछाडि पार्दै पाँचौँ स्थान सुरक्षित गरेको हो। २२ अंक जोडेको नेपालले हालसम्म २७ खेलमध्ये १० मा जित र १५ मा हार व्यहोरेको छ भने टोलीको दुई खेल रद्द भएको थियो।
सोमबार कीर्तिपुरस्थित त्रिवि क्रिकेट मैदानमा स्कटल्यान्डले प्रस्तुत गरेको १९५ रनको लक्ष्य नेपालले ३८.१ ओभरमा मात्र ४ विकेट गुमाएर पूरा गर्यो। नेपालको जितमा कप्तान रोहित पौडेलले कप्तानी इनिङ खेल्दै अविजित ७४ रन बनाए। उनले ९८ बलमा ५ चौका र २ छक्का प्रहार गरे।
त्यस्तै, उत्कृष्ट ब्याटिङ गरेका इशान पाण्डेले ६१ बलमा ५ चौका र २ छक्काको मद्दतमा ५५ रनको अर्धशतकीय योगदान दिए। इशान र रोहितबीच चौथो विकेटका लागि १०४ रनको महत्वपूर्ण शतकीय साझेदारी भएको थियो।
त्यसअघि, ओपनरद्वय आसिफ शेख र कुशल भुर्तेलले पहिलो विकेटका लागि ५८ रनको साझेदारी गर्दै नेपाललाई बलियो सुरुवात दिलाएका थिए। आसिफले २९ रन र कुशलले २८ रन बनाए। बलिङतर्फ स्कटल्यान्डका मार्क वाटले २ तथा ब्रान्डन म्याकमुलेनले १ विकेट लिए।
त्यसअघि टस हारेर पहिले ब्याटिङको निम्तो पाएको स्कटल्यान्डले ३९.१ ओभरमा आफ्ना सबै विकेट गुमाएर १९४ रन मात्र बनाउन सक्यो।
स्कटल्यान्डका लागि ब्रान्डन म्याकमुलेनले आक्रामक ब्याटिङ गर्दै ४४ बलमा समान ६ चौका र ६ छक्का प्रहार गरी सर्वाधिक ७३ रन बनाए। माइकल इंग्लिसले ७१ बलमा ४ चौका र १ छक्का प्रहार गर्दै ५१ रनको अर्धशतकीय इनिङ खेले। ओपनर जर्ज मुन्सीले २१ रन, मार्क वाटले २० रन र कप्तान रिची बेरिंगटनले १२ रन जोड्नुबाहेक अन्य ब्याटर चल्न सकेनन्।
स्कटल्यान्डलाई सस्तैमा समेट्न नेपालका ललित राजवंशीले घातक बलिङ गर्दै ४ विकेट लिए। यस्तै, सन्दीप लामिछानेले ३ विकेट लिँदा सोमपाल कामी, नन्दन यादव र दीपेन्द्र सिंह ऐरीले समान १–१ विकेट बाँडे।
घरेलु टोलीसँग पराजित भए पनि स्कटल्यान्ड ३८ अंकका साथ तालिकाको शीर्ष स्थानमा कायम छ। स्कटल्यान्डले ३१ खेल खेल्दै १६ मा जित र ९ मा हार व्यहोरेको छ भने उसको ६ खेल रद्द भएको छ।
